“नगर-पुणे रेल्वेमार्गासाठी पाठपुरावा करावा”, मा. खा. प्रसाद तनपुरे यांचा खासदार लंके यांना सल्ला

राहुरी : (प्रतिनिधी)

  बलाढय शक्तींविरोधात लढून लोकसभा निवडणूकीत तुम्ही यश मिळविले असून आता नगर-पुणे रेल्वेमार्गासह नगर-मनमाड रस्त्याच्या कामासाठीही पुढाकार घ्या असा सल्ला मा. खा. प्रसाद तथा बापूसाहेब तनपुरे यांनी खा. नीलेश लंके यांना दिला.

  नुकत्याच झालेल्या लोकसभा निवडणूकीत विजय संपादन केल्यानंतर नवनिर्वाचित खासदार निलेश लंके यांनी राहुरी येथे माजी खासदार प्रसाद तनपुरे यांची त्यांच्या राहुरी येथील फार्म हाऊसवर जाउन    भेट घेउन आशिर्वाद घेतले. यावेळी माजी खासदार तनपुरे कुटूंबियांच्या वतीने खासदार लंके यांचा सत्कार करण्यात आला.यावेळी राहुरी नगरपरिषदेच्या मा.नगराध्यक्षा डॉ. उषाताई तनपुरे,सह सोनाली तनपुरे, सोहम तनपुरे आदी मान्यवर यावेळी उपस्थित होते.

    यावेळी बोलताना माजी.खा.तनपुरे म्हणाले,नगर जिल्याच्या विकासाठी संसदेमध्ये विविध आयुधांचा वापर करून आपल्या मतदारसंघासाठी जास्तीत जास्त निधी उपलब्ध करून मतदार संघाच्या सर्वांगीण विकासासाठी भरीव काम करणे आवश्यक आहे.यासाठी जास्तीत जास्त प्रयत्न करून केंद्राच्या विविध विकास कामे करण्यासाठी प्रयत्न करण्याचा सल्लाही त्यांनी दिला. यावेळी तनपुरे यांनी त्यांच्या राजकीय वाटचालीतील काही अनुभव खासदार लंके यांना सांगितले.तसेच पूर्वीच्या व सध्याच्या राजकारणामध्ये झालेल्या बदलाचीही त्यांनी तुलना केली.विखे कुटूंबासारख्या बलाढया शक्तीविरोधात तुम्ही लढत देऊन निवडणूक जिंकलात. यशाची ही घोडदौड अशीच सुरू ठेवा, तनपुरे परीवार आपल्या पाठीशी सदैव असेल अशी ग्वाही तनपुरे यांनी दिली.

 तसेच नगर-मनमाड रस्त्याच्या दुरूस्तीसंदर्भात आपण अलिकडेच केंद्रीय मंत्री नितीन गडकरी यांची भेट घेऊन चर्चा केल्याचे खा. लंके यांनी यावेळी सांगितले. पुढील आठवडयात वरिष्ठ अधिकाऱ्यांसमवेत मंत्री गडकरी यांनी बैठकीचे आयोजन केले असून या बैठकीत या रस्त्याच्या कामासंदर्भात सकारात्मक निर्णय होईल असा विश्‍वास खा. लंके यांनी यावेळी व्यक्त केला. खा. लंके यांचे सहकारी तथा नांदूरपठारचे मा. उपसरपंच रविंद्र राजदेव यावेळी उपस्थित होते.